ಪ್ರೀತಿಯಂಗಡಿ

ನನ್ನ ಮನಸಿನ ಅಂಗಡಿಯಲಿ

ರಾಶಿ ರಾಶಿ ಕನಸುಗಳ ಕೂಡಿಟ್ಟು

ಬಣ್ಣ ಬಣ್ಣದ ಆಸೆಗಳ ಬಿಡಿಸಿಟ್ಟು

ಎಲ್ಲವನು ನಿನಗಾಗೆ ಮುಡಿಪಿಟ್ಟು

ತಲುಪಿಸುವುದು ಹೇಗೆಂದು ಅರಿಯದೆ

ಆಸೆಗಳ ಆಕರ್ಷಣೆಗೆ ಓಗೊಟ್ಟು

ಕನಸುಗಳ ಕಂಪಿನ ಜಾಡು ಹಿಡಿದು

ನೀನೆ ಬರುವೆಯೆಂದು ಕಾಯುತ

ವರುಷ ವರುಷಗಳೆ ಕಳೆದರೂ

ಋತು ಮುಗಿಯುತ ಬಂದರೂ

ನೀನೆಂದು ಬರದೇ ಇದ್ದ ಮೇಲೆ

ನಾನೇ ಕುದ್ದು ಕೊಡಲು ಬಂದಾಗ

ನೀನಾಗಲೆ ಬೇರೊಂದು ಅಂಗಡಿಯ ಮುಂದೆ

ನಗುತಾ ನಿಂತು ಪ್ರೀತಿ ವ್ಯವಹರಿಸುತಿದ್ದೆ

ಇನ್ನೆಲ್ಲಿಯ ಬೆಲೆ ನಿನಗೆಂದೇ ಮುಡಿಪಿಟ್ಟ

ಕೇವಲ ನಿನ್ನದೆ ಆಸೆ ಕನಸು ತುಂಬಿದ

ಈ ಬಡವನ ಪುಟ್ಟ ಅಂಗಡಿಗೆ

ನನ್ನ ಕರಗಿದ ಆಸೆಗಳ ಅಲ್ಲೇ ಬಿಟ್ಟು

ಮುದುಡಿ ಹೋದ ಕನಸುಗಳ ಸುಟ್ಟು

ಭಾರವಾದ ಹೃದಯವ ಹೊತ್ತು

ಹೊರಟಿರುವೆನಿಂದು ಬರಿಗೈಯಲಿ

ಮಬ್ಬು ಮಬ್ಬಾದ ದಾರಿಯಲಿ

ತಿಳಿಯದಾಗಿದೆ ಎಲ್ಲಿಗೆಂದು

ಆದರೂ ಹೋಗಲೆಬೇಕಿದೆ, ಹೊರಟಿರುವೆ!