ಪ್ರೀತಿಯ ಕೃಷಿ

ಮುಂಗಾರಿನ ಸಮಯದಲಿ
ಹೃದಯವೆಂಬ ಹೊಲದಲಿ
ಹದ ಮಾಡಿ ಕೃಷಿ ಮಾಡುತ್ತಿರುವ
ಪ್ರೀತಿ ಬೆಳೆ ಬೆಳೆಯುತ್ತಿರುವ
ನೀನು, ಯಾವ ರೈತನ ಮಗಳೇ?

ನೀ ಗೀಚಿದ ನೇಗಿಲ ಸಾಲುಗಳಲ್ಲೆಲ್ಲಾ
ಬಿತ್ತರಿಸದ ಪ್ರೀತಿಯ ಮೊಳಕೆಗಳು
ವಾಟೆ ಎತ್ತಿ ಮೇಲೆ ಬರುತಿರೆ
ನನ್ನೊಳಗೇನೋ ಪ್ರೀತಿಯ ಬಸುರಿನ ಅನುಭವ

ಇಳಿಯುತಿವೆ ಬೇರುಗಳು ಆಳಕ್ಕೆ
ಬೆಳೆಯುತಿವೆ ರೆಂಬೆ-ಕೊಂಬೆಗಳು ಹೊರಚಾಚಿ
ತಣಿಯುತಿರೆ ಹೃದಯ ಸೊಂಪಾಗಿ ಬೆಳೆದ ಪೈರಿನಿಂದ
ನನಗೇನೋ ಜೀವನವೇ ತಂಪಾದ ಅನುಭವ

ಹೃದಯದಲ್ಲೊಂದು ಪುಟ್ಟ ಗುಡಿಸಲು ಕಟ್ಟಿ
ಸುತ್ತಲು ಮುಳ್ಳಿನ ಬೇಲಿ ಕಟ್ಟಿ
ಕಾಪಾಡುತಲಿರೆ ನಿನ್ನ ಪ್ರೀತಿಯ ಬೆಳೆಯನು
ನನಗೇನೋ ಕಬ್ಬಿಣದ ಕವಚ ಧರಿಸಿದ ಅನುಭವ

ಶುದ್ಧಿಗೊಳಿಸುತಿರುವೆ ನನ್ನ ಹೃದಯವನು
ಹರಗಿ ಕಳೆದು, ಹುಟ್ಟಿದ ಕಳೆಯ
ಹುಡುಕಿ ಕೊಲ್ಲುತಿರೆ, ಆಕ್ರಮಿಸಿದ ಕ್ರಿಮಿಗಳ
ನನ್ನೊಳಗೇನೋ ದೇಹಾತ್ಮ ಶುದ್ಧಿಯಾದ ಅನುಭವ

ನನ್ನ ಹೃದಯದ ಚೆಲುವೇ ಬದಲಾಗಿದೆ ಇಂದು
ಹುಲುಸಾದ ಬೆಳೆಯ ಹಸಿರು ರಂಗಿನಿಂದ
ನಾ ಸಿರಿವಂತನಾದೆ ನಿನ್ನ ಪ್ರೀತಿಯ ಫಸಲಿನಿಂದ
ಈ ಬದಲಾವಣೆ ಸಾಧ್ಯವಾದದ್ದು ಕೇವಲ ನಿನ್ನಿಂದ